Bunge la Ethiopia lamteua waziri wa mambo ya nje kuwa rais mpya

Mabunge mawili ya Ethiopia yamemteua Waziri wa Mambo ya Nje wa nchi hiyo Taye Atske Selassie kuwa rais mpya.

Uteuzi huo unafuatia kumalizika kwa muhula wa rais wa sasa Sahle-Work Zewde, baada ya kuongoza nchi hiyo kwa miaka sita.

Rais huyo mpya aliyeteuliwa ameapishwa siku ya Jumatatu mbele ya wajumbe wa Mabaraza ya Ehiopia ya Wawakilishi wa Umma na lile la Shirikisho kuwa rais mpya wa nchi hiyo.

Akiwa na uzoefu wa kidiplomasia kwa muda wa miongo mitatu, ikiwa ni pamoja na jukumu lake la kuwa mwakilishi wa kudumu wa Ethiopia kwenye Umoja wa Mataifa, Atske Selassie amekuwa waziri wa mambo ya nje wa nchi hiyo kuanzia Februari mwaka huu hadi uteuzi wake huo mpya.